Rumıniya

SOCAR-ın Avropada ilk nümayəndəliyi 2007-ci ildə Şərqi Avropanın giriş qapısı hesab edilən Rumıniyada açılıb. Məqsəd Azərbaycanın karbohidrogen ehtiyatlarını Rumıniya və ümumilikdə, Şərqi və Mərkəzi Avropa ölkələrinə çatdırmaqla regionun enerji bazarına daxil olmaq idi.

30 yanvar 2011-ci il tarixində isə SOCAR, Rumıniyada “SOCAR Petroleum SA” şirkətini təsis etməklə bu ölkədə biznes fəaliyyətinə başlayıb. “SOCAR Petroleum SA”-nın yaradılmasında məqsəd ölkə ərazisində neft məhsullarının alqı-satqısının təşkili və beynəlxalq standartlara uyğun, keyfiyyətli təchizat xidmətinin həyata keçirilməsi olub. Həmin ilin sentyabr ayında SOCAR artıq Rumıniyada 1 neft bazasına və "AVRO-5" standartlarının tələblərinə uyğun yüksək keyfiyyətli yanacaq məhsulları təqdim edən 13 yanacaqdoldurma məntəqəsi (YDM) şəbəkəsinə malik idi.

YDM şəbəkəsini ilbəil genişləndirən “SOCAR Petroleum SA”, 25 aprel 2023-cü il tarixinə bu rəqəmi 74-ə çatdırıb. Sözügedən məntəqələrdən 3-ü “SOCAR” brendi altında fəaliyyət göstərən françayzlardır. Hazırda “SOCAR Petroleum SA” Buxarestdə və Rumıniyanın daha 27 regionunda “SOCAR” brendli YDM şəbəkəsinə malikdir. "SOCAR Petroleum SA" şirkətinin təsdiq etdiyi strateji inkişaf planına uyğun olaraq paytaxt Buxarest də daxil olmaqla Rumıniya üzrə "SOCAR" brendi altında fəaliyyət göstərən YDM şəbəkəsinin genişləndirilməsi davam etdirilir.

YDM-lərdə şirkətə məxsus "CAFE NAR" iaşə obyektləri fəaliyyət göstərir.

YDM-lərdə elektromobillərin enerji ilə təminatı üçün şərait yaradılıb. Müştərilər yol vergisi də daxil olmaqla bir sıra ödənişlərin həyata keçirilməsi üçün xüsusi avadanlıqlardan və 24 saatlıq ATM xidmətindən faydalana bilirlər. Nəhayət, “SOCAR Fleet CARD” kartlarına malik olan sürücülər yanacaq doldurarkən müəyyən bonuslar əldə etmək imkanı əldə edirlər. SOCAR-ın ölkə üzrə bütün məntəqələrində quraşdırılan monitorlarda, mütəmadi olaraq Azərbaycanın təbliği istiqamətində video-çarxlar da nümayiş olunur.

2020-ci ildə “SOCAR Petroleum SA” Rumıniyada növbəti uğurlu layihəsini reallaşdırmaqla şirkət tarixində çox vacib bir mərhələyə qədəm qoyub. Rumıniyanın qərb bölgəsindəki Alba-İulia regionunun Teiuş şəhərində “SOCAR Petroleum SA” şirkətinin ilk deposu istifadəyə verilib. Hazırda Şirkət 3 yanacaq deposu ilə fəaliyyət göstərir. Neft məhsullarının topdan satışının təşkil edən “SOCAR Petroleum SA” tərəfindən sərfəli qiymətlərlə yüksək keyfiyyətli neft məhsulları kənd təsərrüfatı, tikinti, nəqliyyat və digər sektorlarda çalışan müəssisələrə çatdırılır.

“SOCAR Petroleum SA” Şərqi və Mərkəzi Avropa, həmçinin Balkan ölkələrinə Azərbaycan istehsalı olan neft-kimya məhsullarının (metanol, bitum, gübrə və s.) da satışını həyata keçirir. Bu sahədə Rumıniya bazarına qısa bir zamanda daxil olmağına baxmayaraq, 2020-ci ildə metanol satışı üzrə aparıcı şirkətlərdən birinə çevrilməyi bacarıb.

SOCAR Petroleum SA haqqında tanıtım videoçarxı: