Xəbərlər arxivi

24 Sentyabr 2022

“Enerji və Dördüncü Sənaye İnqilabı” hakatonunun qaliblərinə mükafatlar təqdim edilib

+

Sentyabrın 24-də Bakı Ali Neft Məktəbində (BANM) Azərbaycan Respublikası Dövlət Neft Şirkətinin (SOCAR) və Dördüncü Sənaye İnqilabının Təhlili və Koordinasiya Mərkəzinin (4SİM) birgə təşkilatçılığı ilə keçirilən “Enerji və Dördüncü Sənaye İnqilabı” hakaton müsabiqəsinin qaliblərinin mükafatlandırılma mərasimi keçirilib. Azərbaycanda, xüsusilə Şərqi Zəngəzur və Qarabağ iqtisadi rayonlarında “yaşıl” və rəqəmsal enerji texnologiyalarının tətbiqi, bərpa olunan enerji resurslarından istifadənin genişləndirilməsi və enerji təhlükəsizliyinin gücləndirilməsi üçün innovativ ideyalara dəstək vermək məqsədilə təşkil olunan müsabiqə “enerji və əşyaların interneti”, “enerji və süni intellekt”, “enerji və rəqəmsal iqtisadiyyat” mövzularını əhatə edib.

Tədbirin əvvəlində Ermənistan silahlı qüvvələrinin genişmiqyaslı təxribatlarının qarşısını alarkən şəhid olan qəhrəmanlarımızın əziz xatirəsi bir dəqiqəlik sükutla yad edilib.

Daha sonra “Enerji və Dördüncü Sənaye İnqilabı” hakatonu ilə bağlı video təqdimat nümayiş olunub.

Mükafatlandırma mərasimində çıxış edən BANM-in rektoru Elmar Qasımov hakatonun istedadlı gənclərin bilik və bacarıqlarının inkişaf etdirilməsi, innovativ ideyalarının təqdim olunması baxımından xüsusi əhəmiyyət kəsb etdiyini vurğulayıb. Yarışda innovativ düşüncələrə sahib gənclərin maraqlı layihələr təqdim etdiklərini diqqətə çatdıran Elmar Qasımov müsabiqənin həm yeni dostluqların yaranması, həm də bilik mübadiləsi üçün əlverişli mühit yaratdığını bildirib.

SOCAR-ın prezidenti Rövşən Nəcəf müsabiqənin qaliblərini təbrik edərək hakatonun mövzusunun ölkəmizin strateji hədəfləri istiqamətində müəyyənləşdirildiyini, bu xüsusda Azərbaycanda yeni və innovativ ideyaların formalaşmasına, bərpa olunan enerji mənbələrinin inkişafına, yüksəkixtisaslı kadr potensialının gücləndirilməsinə dəstək olmaq məqsədi daşıdığını bildirib. Qarabağın “yaşıl enerji” zonasına çevrilməsinin dövlət başçısının müəyyənləşdirdiyi müasir inkişaf strategiyasının əsas tərkib hissəsi olduğunu vurğulayan SOCAR prezidenti, Qarabağ və Şərqi Zəngəzur iqtisadi rayonlarında bərpa olunan enerji resurslarının tətbiqi ilə regionda kiçik və orta biznes subyektlərinin inkişafına, məşğulluq səviyyəsinin yüksəldilməsinə və regionun enerji təhlükəsizliyinin gücləndirilməsinə dəyərli töhfə veriləcəyini söyləyib. SOCAR-ın enerji keçidi, rəqəmsallaşma və innovasiya kimi strateji təşəbbüslərindən bəhs edən Rövşən Nəcəf, alternativ enerji mənbələri, data analitika, süni zəka əsaslı qərarvermə, əşyaların interneti kimi sahələrdə gənclərin uğurlu çıxışından məmnunluğunu ifadə edib.

4SİM-in icraçı direktoru Tamerlan Tağıyev gənclərin layihəyə olan böyük marağını vurğulayaraq müsabiqənin əhəmiyyəti barədə danışıb. Qlobal iqtisadiyyatda Dördüncü Sənaye İnqilabının və rəqəmsallaşmanın diktəedici və həlledici rolundan bəhs edən 4SİM-in icraçı direktoru bu prosesdə Azərbaycanın mövqeyinin gücləndirilməsinin və aparıcı ölkələr sırasında yer almasının qarşıda duran məqsədlərdən olduğunu bildirib.

Tamerlan Tağıyev innovativ ideyalara malik istedadlı gənclərə dəstək olmaq, ölkəmizdə rəqəmsal bilik və bacarıqları, həmçinin innovasiya ekosistemini inkişaf etdirmək üçün belə layihələrin gələcəkdə də keçirilməsinin planlaşdırıldığını qeyd edib.

Çıxışlardan sonra münsiflərə, mentorlara, könüllülərə və tədbirin təşkilatçılarına təşəkkürnamələr təqdim edilib. “Ən kreativ komanda” və “Ən əzmkar komanda” nominasiyaları üzrə həvəsləndirici mükafatlara “Outliers” və “DataMass” komandaları layiq görülüblər.

Daha sonra üçüncü, ikinci və birinci yerin qalibləri elan olunub. “Hydroponics” komandası birinci, “Zəngəzur” komandası ikinci, “Generation Z” komandası isə üçüncü yerin qalibi olub. Komandalara mükafatları SOCAR-ın prezidenti Rövşən Nəcəf, 4SİM-in icraçı direktoru Tamerlan Tağıyev və BANM-in rektoru Elmar Qasımov təqdim ediblər.

21 Sentyabr 2022

SOCAR-ın prezidenti Rövşən Nəcəfin İsrailin ölkəmizdəki fövqəladə və səlahiyyətli səfiri Corc Dik ilə görüşünə dair məlumat

+



Azərbaycan Respublikası Dövlət Neft Şirkətinin (SOCAR) prezidenti Rövşən Nəcəf 2022-ci il sentyabrın 21-də İsrailin ölkəmizdəki fövqəladə və səlahiyyətli səfiri Corc Dik ilə görüşüb.

Görüşdə Azərbaycan-İsrail iqtisadi əlaqələrinin uğurla inkişaf etdiyi bildirilib və iki ölkə arasında neft-qaz sektorunda səmərəli əməkdaşlığın əhəmiyyəti qeyd olunub.

Görüş zamanı xam neft və neft məhsullarının ticarəti, həmçinin qarşılıqlı maraq doğuran digər məsələlər ətrafında fikir mübadiləsi aparılıb.

20 Sentyabr 2022

SOCAR-da “Neftçilər Günü” münasibətilə keçirilən tədbirə dair məlumat

+

2022-ci il sentyabrın 20-də “Əsrin müqaviləsi”nin imzalanmasının 28-ci ildönümü və neft-qaz sənayesi işçilərinin peşə bayramı - “Neftçilər Günü” münasibətilə tədbir keçirilib.

İlk öncə Azərbaycan Respublikasının iqtisadiyyat naziri və SOCAR-ın Müşahidə Şurasının sədri Mikayıl Cabbarov, Azərbaycan Respublikasının energetika naziri Pərviz Şahbazov, SOCAR-ın Müşahidə Şurasının üzvü, Azərbaycan İnvestisiya Holdinqinin baş icraçı direktoru Ruslan Əlixanov, SOCAR-ın prezidenti Rövşən Nəcəf və SOCAR-ın kollektivi Fəxri xiyabanda müstəqil Azərbaycanın qurucusu, ölkəmizin yeni neft strategiyasının banisi, xalqımızın ümummilli lideri Heydər Əliyevin məzarını ziyarət edib, Ulu Öndərin əziz xatirəsini dərin hörmət və ehtiramla yad ediblər.



Sonra Şəhidlər xiyabanına gələn tədbir iştirakçıları ölkəmizin ərazi bütövlüyü uğrunda qəhrəmancasına canlarını fəda etmiş bütün şəhidlərimizin əziz xatirəsini dərin minnətdarlıqla anıblar, “Əbədi məşəl” abidəsinin önünə əklil qoyublar.

“SOCAR Tower”də keçirilən tədbirdə iştirakçılar ulu öndər Heydər Əliyevin neft sənayesinin inkişafına göstərdiyi diqqət və qayğısını əks etdirən foto-sərgi, həmçinin Respublika Elmi-Texniki Kitabxanası tərəfindən təqdim olunan və neft sənayesi tarixindən bəhs edən nadir kitablar ilə tanış olublar.



“Neftçilər Günü”nə həsr olunan konfransın əvvəlində Azərbaycanın ərazi bütövlüyü uğrunda qəhrəmancasına şəhid olmuş hərbiçilərimizin əziz xatirəsi bir dəqiqəlik sükutla yad edilib.



SOCAR-ın prezidenti Rövşən Nəcəf tədbirdə çıxış edərək Ermənistan silahlı qüvvələrinin genişmiqyaslı təxribatlarının qarşısını alarkən qəhrəmancasına həlak olan hərbiçilərimizə Allahdan rəhmət, ailələrinə və yaxınlarına səbr diləyib.



“Neftçilər Günü” münasibətilə Azərbaycan neftçilərini təbrik edən Rövşən Nəcəf Azərbaycan Respublikasının Prezidenti cənab İlham Əliyev tərəfindən əməkdə fərqlənən bir qrup neftçinin yüksək dövlət mükafatlarına layiq görülməsinin ölkə başçısının çətin və məsuliyyətli neftçi peşəsinə verdiyi yüksək qiymətin növbəti təzahürü olduğunu bildirib və SOCAR kollektivi adından cənab Prezidentə minnətdarlığını ifadə edib.



Rövşən Nəcəf ölkəmizin dayanıqlı və inkluziv inkişafının təməlinin ulu öndər Heydər Əliyevin müdrik və qətiyyətli rəhbərliyi, cənab Prezident İlham Əliyevin uğurlu diplomatiyası nəticəsində “Əsrin müqaviləsi” ilə qoyulduğunu qeyd edib. SOCAR-ın prezidenti “Əsrin müqaviləsi”nin ölkə iqtisadiyyatının müxtəlif sahələrinin, xüsusilə neft sənayesinin və insan kapitalının davamlı inkişafına güclü təkan verdiyini və Azərbaycanın iqtisadi qüdrətini daha da artırdığını vurğulayıb. Rövşən Nəcəf ölkə başçısının məqəsədyönlü və uzaqgörən rəhbərliyi ilə qurulan çoxşaxəli ixrac-nəql sisteminin Azərbaycanın enerji resurslarının dünya bazarlarına birbaşa çıxışını təmin etdiyini, ölkəmizin rəqabət qabiliyyətinin artmasına və enerji təhlükəsizliyinin güclənməsinə əlverişli zəmin yaratdığını deyib.



Builki “Neftçilər Günü”nün “Əsrin müqaviləsi” çərçivəsində “Çıraq” platformasından ilk neft hasilatının 25-ci ildönümünə təsadüf etdiyini bildirən Rövşən Nəcəf bu münasibətlə bütün xarici tərəfdaşları təbrik edib, neft sənayemizin inkişafına verdikləri töhfəyə görə onlara təşəkkür edib.



Neftçilərimizi əlamətdar gün münasibətilə təbrik edən iqtisadiyyat naziri və SOCAR-ın Müşahidə Şurasının sədri Mikayıl Cabbarov “Əsrin müqaviləsi”nin və uğurla reallaşdırılan milli neft strategiyasının ölkəmizin sosial-iqtisadi inkişafına, iqtisadiyyata irihəcmli investisiyaların cəlb olunmasına, beynəlxalq aləmdə nüfuzunun artmasına və dünya iqtisadiyyatına inteqrasiya prosesinin sürətlənməsinə xidmət etdiyini, həyata keçirilən genişmiqyaslı neft-qaz layihələrinin Azərbaycanın enerji təhlükəsizliyini təmin etməklə yanaşı, tərəfdaşlarımızın etibarlı enerji təminatına da böyük töhfə verdiyini vurğulayıb.



Energetika naziri Pərviz Şahbazov neftçiləri peşə bayramı münasibətilə təbrik edib, ölkəmizdə “Neftçilər Günü”nün təsis edilməsinin Azərbaycanın neft strategiyasının banisi, xalqımızın ümummilli lideri Heydər Əliyevin neftçi peşəsinə verdiyi yüksək qiymətin, bu peşə sahiblərinin öz əzmkar zəhmətləri ilə müstəqilliyimizin möhkəmləndirilməsində oynadıqları mühüm rolun göstəricisi olduğunu bildirib. Nazir çıxışında Azərbaycanın enerji təhlükəsizliyinin təminatında və etibarlı tərəfdaş mövqeyinə yüksəlməsində “Əsrin müqaviləsi”nin davamlı töhfələrindən bəhs edib.



BP-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli çıxış edərək “Neftçilər Günü” münasibətilə təbriklərini çatdırıb. Bu günün həm də Azəri-Çıraq-Günəşli yatağı üzrə hasilatın pay bölgüsü haqqında sazişin 28-ci ildönümü ilə əlamətdar olduğunu söyləyən Bəxtiyar Aslanbəyli “Əsrin müqaviləsi”nin ümummilli lider Heydər Əliyevin mükəmməl, uzaqgörən strategiyasının şah əsərlərindən biri olduğunu vurğulayıb. O bu müqavilənin həm karbohidrogen ehtiyatlarının, həm də qoyulan sərmayələrin həcminə görə dünyada bağlanan ən iri sazişlərdən biri olduğunu bildirib.



SOCAR-ın birinci vitse-prezidenti Xoşbəxt Yusifzadə “Əsrin müqaviləsi”nin tarixi əhəmiyyətindən bəhs edərək bu müqavilənin ulu öndər Heydər Əliyevin şəxsi nüfuzu, qətiyyətli mövqeyi və həmin dövrdə Azərbaycan nümayəndə heyətinin rəhbəri kimi danışıqlar prosesində iştirak edən cənab İlham Əliyevin diplomatik məharəti nəticəsində imzalandığını vurğulayıb.



Sonra SOCAR-ın Baş ofisində, strukturuna daxil olan müəssisələrdə, birgə müəssisələrdə, əməliyyat şirkətlərində və tərəfdaş şirkətlərdə çalışan və əmək fəaliyyətində fərqlənən bir qrup neftçi “Fəxri neftçi” döş nişanı və Fəxri fərmanla təltif olunub.



Daha sonra SOCAR-ın prezidenti Rövşən Nəcəf tərəfindən neftçilərin Azərbaycan Respublikasının Prezidenti cənab İlham Əliyevə ünvanladıqları təşəkkür məktubu oxunub.



Konfransda, həmçinin SOCAR-ın yeni yaradılan Könüllülər qrupunun təqdimatı keçirilib. Könüllülər qrupunun üzvü Aysu Zamanova çıxışında ölkə başçısının təşəbbüsü ilə başladılan könüllülük hərəkatının dövlətimizin həyata keçirdiyi gənclər siyasətinin əsas istiqamətlərindən biri olduğunu bildirib, könüllülük fəaliyyətinin gənclərin müxtəlif sahələr üzrə təcrübə qazanması və mühüm biliklərə yiyələnməsi baxımından əhəmiyyət kəsb etdiyini vurğulayıb.



Tədbir çərçivəsində “Neftçilər Günün”ə həsr olunmuş “Mən fəxr edirəm ki, neftçiyəm” adlı videoçarx nümayiş etdirilib.

16 Sentyabr 2022

SOCAR prezidenti Rövşən Nəcəfin Pakistanın neft üzrə dövlət naziri Musadik Məsud Malik ilə görüşünə dair məlumat

+

Azərbaycan Dövlət Neft Şirkətinin (SOCAR) prezidenti Rövşən Nəcəf 2022-ci il sentyabrın 16-da Pakistan İslam Respublikasının Energetika Nazirliyinin neft üzrə dövlət naziri Musadik Məsud Malik ilə görüşüb. Görüşün əvvəlində Musadik Məsud Malik Pakistan dövlətinin Azərbaycan Respublikasının ərazi bütövlüyünə və suverenliyinə dəstəyini bir daha ifadə edib, Ermənistan silahlı qüvvələrinin genişmiqyaslı təxribatlarının qarşısını alarkən şəhid olan hərbiçilərimizin ailələrinə və Azərbaycan xalqına başsağlığı verib.

Söhbət zamanı Azərbaycan-Pakistan münasibətlərinin müxtəlif sahələrdə uğurla inkişaf etdiyi vurğulanıb, neft-qaz sektorunda, xüsusilə neft məhsullarının ticarəti, maye təbii qaz (LNG) təchizatı, həmçinin təbii qaz infrastrukturunun inkişafı istiqamətlərində qarşılıqlı əməkdaşlıq perspektivləri müzakirə edilib.

Görüşdə SOCAR-ın uzunmüddətli strateji təşəbbüslərindən bəhs edilib, regional və qlobal enerji layihələri, habelə xarici ölkələrdə reallaşdırdığı investisiyaları haqqında qonaq nazirə məlumat verilib.

Bu xüsusda, Pakistan şirkətləri ilə potensial əməkdaşlıq imkanları nəzərdən keçirilib, qarşılıqlı maraq doğuran digər məsələlər ətrafında fikir mübadiləsi aparılıb.

11 Sentyabr 2022

SOCAR-ın prezidenti Rövşən Nəcəfin rəhbərlik etdiyi nümayəndə heyətinin “Neft Daşları”na səfərinə dair məlumat

+

Azərbaycan Respublikası Dövlət Neft Şirkətinin (SOCAR) prezidenti Rövşən Nəcəfin rəhbərlik etdiyi nümayəndə heyəti 2022-ci il sentyabrın 10-da “Neft Daşları”na səfər edib. Nümayəndə heyəti xalqımızın ümummilli lideri Heydər Əliyevin “Neft Daşları”nda ucaldılmış abidəsini ziyarət edib, önünə gül dəstələri düzüb.

Sonra Ulu Öndərin adını daşıyan muzeydə nümayəndə heyətinə Ümummilli Liderin neft sənayesinin inkişafına göstərdiyi diqqət və qayğısını əks etdirən tarixi fotolar, habelə ictimai-siyasi və dövlətçilik fəaliyyətinə həsr olunmuş kitablar haqqında ətraflı məlumat verilib.

Rövşən Nəcəf muzeyin xatirə kitabına öz ürək sözlərini yazıb.

Səfər çərçivəsində görkəmli neftçi-geoloq Ağaqurban Əliyevin abidəsi, Xəzəri fəth edərkən dənizdə həlak olan neftçilərin xatirəsinə ucaldılmış abidə kompleksi ziyarət edilib.

Ölkəmizin ərazi bütövlüyü uğrunda qəhrəmancasına şəhid olmuş neftçilərin abidə kompleksini ziyarət edən nümayəndə heyətinin qazilərlə görüşü keçirilib.

“Neft Daşları”nın 30 illiyi münasibəti ilə ucaldılmış kompozisiya ilə tanış olan nümayəndə heyəti burada “Neft Daşları” NQÇİ-nin əməkdaşları ilə görüşüb.

Görüşdə Rövşən Nəcəf əsası xalqımızın ümummilli lideri Heydər Əliyev tərəfindən qoyulan və Azərbaycan Respublikasının Prezidenti cənab İlham Əliyev tərəfindən müvəffəqiyyətlə davam etdirilən yeni neft strategiyamızın uğurla icra edilməsində Azərbaycan neftçilərinin müstəsna rola malik olduğunu vurğulayıb.

Neftçi peşəsinin böyük əzmkarlıq və fədakarlıq tələb etdiyini bildirən SOCAR prezidenti onları qarşıdan gələn “Neftçilər Günü” peşə bayramı münasibətilə təbrik edib. Görüşdə bir sıra əməkdaş səmərəli əmək fəaliyyətlərinə görə təşəkkürnamə ilə təltif olunub. Daha sonra SOCAR prezidenti neftçilərin şəraiti ilə yaxından tanış olmaq məqsədilə onların qaldığı yataqxananı ziyarət edib.

Nümayəndə heyəti həmçinin Qaz Turbin İstilik Elektrik Stansiyasına, 28 May” NQÇİ-nin “Neft Daşları” sahəsində 1741 saylı estakadayanı meydança ilə Qaz separasiya məntəqəsi arası yeni əvəzedici estakadanın tikintisinə, Sıxıcı Kompressor Stansiyasına və digər istehsalat obyektlərinə yerində baxış keçirib, “Neft Daşları” NQÇİ-nin Operativ İdarəetmə Mərkəzinin fəaliyyəti ilə yaxından tanış olub.

Səfərin sonunda SOCAR-ın nümayəndə heyətinin iştirakı ilə istehsalat müşavirəsi keçirilib. SOCAR-ın uzunmüddətli strateji hədəflərindən bəhs edən Rövşən Nəcəf, bu istiqamətdə peşəkar və yüksəkixtisaslı kadr potensialının əhəmiyyətindən danışıb, “Neft Daşları”nın bundan sonra da insan kapitalımızın inkişafına dəyərli töhfə verməyə davam edəcəyini bildirib.

9 Sentyabr 2022

SOCAR-ın və 4SİM-in birgə təşkilatçılığı ilə “Enerji və Dördüncü Sənaye İnqilabı” mövzusunda keçirilən hakatonun açılış mərasiminə dair məlumat

+



2022-ci il sentyabrın 9-da Bakı Ali Neft Məktəbində (BANM) Azərbaycan Respublikası Dövlət Neft Şirkətinin (SOCAR) və Dördüncü Sənaye İnqilabının Təhlili və Koordinasiya Mərkəzinin (4SİM) birgə təşkilatçılığı ilə “Enerji və Dördüncü Sənaye İnqilabı” mövzusunda təşkil olunan hakaton yarışının açılış mərasimi keçirilib.

“Enerji və əşyaların interneti”, “enerji və süni intellekt”, “enerji və rəqəmsal iqtisadiyyat” mövzuları üzrə keçirilən hakatonun məqsədi Azərbaycanda, xüsusilə Şərqi Zəngəzur və Qarabağ iqtisadi rayonlarında “yaşıl” və rəqəmsal enerji texnologiyalarının tətbiqi, bərpa olunan enerji resurslarından istifadənin genişləndirilməsi və enerji təhlükəsizliyinin gücləndirilməsi üçün innovativ ideyalara dəstək verilməsidir.

Açılış mərasimində çıxış edən BANM-ın rektoru Elmar Qasımov Ali Məktəbin belə əhəmiyyətli tədbirə evsahibliyi etməsindən məmnunluğunu ifadə edib. Rektor hakatonun innovativ yanaşmaları ilə fərqlənən gənclərin istedadlarını, bilik və bacarıqlarını nümayiş etdirmələri baxımından önəmli olduğunu qeyd edib, iştirakçılara uğurlar arzulayıb.

SOCAR-ın vitse-prezidenti Zaur Qurbanov çıxışında Azərbaycanın, o cümlədən Qarabağın və Şərqi Zəngəzurun zəngin bərpa olunan enerji potensialının mövcud olduğunu bildirib. Qeyd edib ki, işğaldan azad olunmuş ərazilərin “yaşıl enerji” zonasına çevrilməsi Azərbaycan Respublikasının Prezidenti cənab İlham Əliyevin müəyyənləşdirdiyi müasir inkişaf strategiyasının tərkib hissəsidir və hakaton da bu istiqamətdə qarşıya qoyulan vəzifələrin reallaşmasına dəstək vermək məqsədi daşıyır.

4SİM-in icraçı direktoru Tamerlan Tağıyev hakatonun keçirilməsinin rəqəmsal bilik və bacarıqların inkişaf etdirilməsi və müasir tələblərə cavab verən yüksəkixtisaslı kadr hazırlığının gücləndirilməsi ilə ölkəmizdə innovasiya ekosisteminin inkişafına töhfə verəcəyini vurğulayıb.

Çıxışlardan sonra hakatonun şərtləri barədə məlumat təqdim olunub və yarışa start verilib.

Qeyd edək ki, 9-11 sentyabr tarixlərində keçiriləcək hakatonun qaliblərinin mükafatlandırılması mərasimi sentyabrın 17-də təşkil olunacaq.