Xəbərlər arxivi

           
                           
                               SOCAR və BP Azərbaycanda geoloji kəşfiyyat işləri üçün yeni hasilatın pay bölgüsü haqqında saziş imzaladılarGallery                            
                           
                               
                               
                                   26 Aprel 2018                                                                    

SOCAR və BP Azərbaycanda geoloji kəşfiyyat işləri üçün yeni hasilatın pay bölgüsü haqqında saziş imzaladılar

                               
                               

Saziş Xəzərdə yeni imkanların araşdırılması üçün şərait yaradır və Azərbaycanın hasilatına uzunmüddətli töhfə vermək potensialına malikdir SOCAR və BP bu gün Xəzər dənizinin Azərbaycan sektorunda Şimali Abşeron hövzəsindəki D230 blokunun birgə kəşfiyyatı və işlənməsi üçün hasilatın pay bölgüsü haqqında yeni saziş (HPBS) imzaladılar.

HPBS Azərbaycan Respublikasının Prezidenti İlham Əliyev və Böyük Britaniyanın baş naziri Tereza Meyin iştirakı ilə London şəhərində SOCAR-ın prezidenti Rövnəq Abdullayev və BP Qrupunun baş icraçı direktoru Bob Dadli tərəfindən imzalanmışdır.

İmzalanma mərasimində çıxış edən SOCAR-ın prezidenti Rövnəq Abdullayev demişdir: “Bizim BP ilə artıq uzunmüddətli əməkdaşlıq ənənəmiz formalaşıb. Əminəm ki, hər iki şirkətin malik olduğu müasir neft-qaz texnologiyaları və unikal tarixi təcrübə sayəsində bu əməkdaşlıq öz uğur silsiləsini davam etdirəcək. Bu gün imzalanan saziş bərabər və ədalətli əsaslar üzərində qurulub və Azərbaycanın təbii ehtiyatlarının ortaq şəkildə maksimum səmərə ilə reallaşdırılması istiqamətində mühüm rol oynayacaq.”

Cənab Dadli demişdir: “Bu saziş Azərbaycanda uzun müddətli hasilatı dəstəkləmək, SOCAR və BP-nin Xəzərdə əlavə imkanların araşdırılması məqsədi ilə yeni birgə səylərinə söykənir. 25 ildən çoxdur ki, biz bu regionda fəaliyyət göstəririk və inanırıq ki, burada hələ də əhəmiyyətli neft və qaz potensialı mövcuddur. Biz SOCAR və digər tərəfdaşlarımızla sıx işləyərək geoloji kəşfiyyat işləri aparmaqla və qarşıdan gələn onilliklərdə Xəzərin gələcəyini təmin etməyə yardımçı olmaqla Azərbaycandakı əhəmiyyətli biznesimizi artırmaqda davam edəcəyik.”

D230 bloku Xəzər dənizində Bakının şimal-şərq istiqamətində təxminən 135 kilometr (84 mil) məsafədə yerləşir. Blok təxminən 3200 kvadrat kilometr ərazini əhatə edir. Blokun məhsuldar laylarının gözlənilən dərinliyi təxminən 3500 metrdir.

25 illik müddəti əhatə edən HPBS-ə əsasən BP 50 faiz işitrak payına malik olmaqla kəşfiyyat dövründə operator olacaq, iştirak payının digər 50 faizi isə SOCAR-a məxsus olacaq.

Bundan əvvəl, 2016-cı ilin may ayında, D230 blokunda geoloji kəşfiyyat işlərinin aparılması haqqında SOCAR-la Qarşılıqlı Anlaşma Memorandumu imzalanmışdı.



Redaktorlar üçün qeydlər

• BP və tərəfdaşları Azərbaycanda ilk HPBS-i SOCAR-la 1994-cü ildə Azəri, Çıraq yataqlarının və Günəşli (AÇG) yatağının dərinlikdə yerləşən hissəsinin işlənməsi üçün imzalamışdır. AÇG üzrə hasilat 1997-ci ildə başlamış və həmin vaxtdan etibarən bu yataqlardan ümumilikdə 3,3 milyard bareldən artıq neft hasil edilmişdir. 2017-ci ildə SOCAR və AÇG tərəfdaşları düzəliş edilmiş və yenidən tərtib olunmuş HPBS-i imzaladılar, bununla da həmin sazişin müddəti 2049-cu ilin sonuna qədər uzadılmışdır.



• BP və tərəfdaşları 1996-cı ildə Şahdəniz qaz-kondensat yatağının işlənməsi üçün HPBS-i imzalamışlar. Bu yataqdan hasilat 2006-cı ildə başlanmışdır. Yatağın işlənməsinin ikinci mərhələsi - Şahdəniz 2 layihəsi çərçivəsində hasilatın bu il başlanması planlaşdırılır.

• BP həmçinin SOCAR-la iki geoloji kəşfiyyat HPBS-i imzalamışdır: 2010-cu ildə Şəfəq-Asiman bloku üzrə və 2014-cü ildə Abşeron yarımadasının ətrafındakı dayaz sulu ərazi üzrə. Hər iki HPBS çərçivəsində seysmik tədqiqat proqramları başa çatmışdır və hazırda qazma əməliyyatlarının planlaşdırılması işləri davam edir.

Əlavə məlumat üçün aşağıdakı telefon nömrələr ilə əlaqə saxlamağınız xahiş olunur:

SOCAR-ın mətbuat xidməti, tel.: +994 12 5210369, press@socar.az

BP-nin Bakı ofisində mətbuat xidməti, tel.: +994 12 5994557

BP-nin London ofisində mətbuat xidməti: +44 20 7496 4076, bppress@bp.com