Xəbərlər arxivi

31 Yanvar 2017

«Azərikimya»da Almaniyanın Azərbaycandakı fövqəladə və səlahiyyətli səfiri Mixael Kindsqrab ilə görüş keçirilmişdir

+

Yanvarın 31-də “Azərikimya” İstehsalat Birliyində Almaniya Federativ Respublikasının Azərbaycandakı fövqəladə və səlahiyyətli səfiri Mixael Kindsqrab ilə görüş keçirilmişdir. Görüşdə «Azərikimya» İB-nin Müşahidə Şurasının sədri, Milli Məclisin deputatı Muxtar Babayev Azərbaycan neft-kimya sənayesinin inkişaf tarixi, Birliyin istehsalat sahələrində aparılan yenidənqurma və modernizasiya işləri, həmçinin perspektiv layihələr haqqında ətraflı məlumat vermişdir. Görüşdə Almaniyanın UNIPER (EON) şirkətinin prezidenti Klaus Şehferin rəhbərlik etdiyi nümayəndə heyətinin Sumqayıta səfəri çərçivəsində enerji və buxar istehsalı sahəsində fəaliyyət göstərəcək birgə müəssisənin - “SOCAR-UNIPER” MMC-nin yaradılması haqqında imzalanan sazişə də toxunulmuşdur.

Səmimi qəbula görə minnətdarlığını bildirən səfir Mixael Kindsqrab iki ölkə arasında münasibətlərin müxtəlif istiqamətlərdə, o cümlədən siyasi, iqtisadi, humanitar sahələrdə dinamik şəkildə inkişaf etdiyini vurğulamış, neft-qaz və kimya sektoruna xüsusi önəm verildiyini qeyd etmiş, bu əməkdaşlığın Azərbaycan-Almaniya münasibətlərinin inkişafına yeni töhfə verəcəyinə əminliyini ifadə etmişdir. Görüşdə həmçinin Sumqayıt Kimya Sənaye Parkında müxtəlif sənaye məhsullarının istehsal olunacağı onlarla kiçik və özəl kimya müəssisələrinin yaradılmasında Almaniya şirkətlərinin və iş adamlarının öz investisiyaları, mütərəqqi texnologiyaları, müasir avadanlıqları ilə iştirakının arzuedilən olduğu diqqətə çatdırılmışdır.

Daha sonra “Azərikimya” İstehsalat Birliyində yaradılmış Heydər Əliyev güşəsini ziyarət edən qonağa Ulu öndərin memarı olduğu yeni neft strategiyasının bu gün möhtərəm prezidentimiz İlham Əliyev tərəfindən uğurla davam etdirildiyi haqda ətraflı məlumat verilmişdir. Görüşdə səfiri maraqlandıran digər məsələlər ətrafında da fikir mübadiləsi aparılmışdir.

31 Yanvar 2017

Ekologiya İdarəsi və Bakı şəhəri üzrə Təhsil İdarəsi arasında Əməkdaşlıq Sazişi imzalanmışdır

+

Ekoloji maarifləndirmə və təbliğat işlərində auditoriyanın genişləndirilməsi, keçirilən tədbirlərin daha sistemli, effektiv və davamlı təşkili zərurəti nəzərə alınaraq, SOCAR-ın Ekologiya İdarəsi və Bakı şəhəri üzrə Təhsil İdarəsi arasında ekoloji maarifləndirmə sahəsində Əməkdaşlıq Sazişi imzalanmışdır. Sazişə əsasən “Təhsili dəyərə çevirək” devizi altında “Ekologiya və sağlamlıq” istiqamətində müxtəlif layihələrin SOCAR-ın Ekologiya İdarəsi ilə birlikdə həyata keçirilməsi nəzərdə tutulur. Ekologiya İdarəsinin əməkdaşları həmçinin məktəbyanı sahələrin yaşıllaşdırılmasında, şagirdlərə seleksiya və calaqetmə vərdişlərinin aşılanmasında, canlı guşələrin və məktəb oranjeriyalarının yaradılmasında məktəblərə köməklik göstərəcəklər.

Qeyd edək ki, SOCAR-ın “Ekoloji təbliğat və maarifləndirməyə dair 2016-2017-ci illər üzrə Tədbirlər Planı”na uyğun olaraq Ekologiya İdarəsi gənclərin ekoloji təhsili və hazırlığının artırılması üçün müxtəlif olimpiadalar, intellektual müsabiqə və yarışmalar, ekskursiyalar, ekoloji maarifləndirməyə xidmət edən digər çoxsaylı tədbirlər keçirir.

31 Yanvar 2017

Zərdab-Şıxbağı-Qışlaq sahəsində çöl işləri aparılmışdır

+

“Azneft” İstehsalat Birliyinin sifarişi əsasında Geofizika və Geologiya İdarəsinin Kəşfiyyatgeofizika İstehsalat Bölümü tərəfindən Yevlax-Ağcabədi neftli-qazlı rayonunun Zərdab-Şıxbağı-Qışlaq sahəsində seysmik, qravimetrik və maqnitometrik üsullarla tədqiqat işləri həyata keçirilmişdir. 178,5 kvadrat kilometrlik sahədə seysmik, 345 xətti kilometr həcmində qravimetrik və 345 xətti kilometr həcmində maqnitometrik çöl işləri aparılmış, əldə olunmuş materiallar emal və interpretasiya edilmişdir. İşlər ekologiya, əməyin mühafizəsi və təhlükəsizlik texnikası qaydalarına əməl olunmaqla aparılmışdır.

Zərdab-Şıxbağı-Qışlaq sahəsində alınmış məlumatların kompleks təhlili əsasında ərazinin geoloji quruluşu dəqiqləşdirilmiş, sahənin neftlilik-qazlılığı proqnozlaşdırılmış, müxtəlif horizontlar üzrə struktur xəritələr qurulmuş, kəşfiyyat quyusunun qazılması üçün yerlər tövsiyyə edilmişdir.

31 Yanvar 2017

BANM-də “Schneider Electric” şirkəti ilə tədris mərkəzi qurulmuşdur

+

“Schneider Electric” şirkətinin Azərbaycandakı nümayəndəliyi Bakı Ali Neft Məktəbində istehsalatda texnoloji proseslərin təhlükəsizliyinin təmin edilməsi və qəzaların qarşısının alınması məqsədi ilə müasir tipli Triconex Demo avtomatlaşdırılmış sistemini qurmuşdur. BANM-in yeni kampusunda “Schneider Electric” şirkəti ilə yaradılan tədris mərkəzində bu sistemdən istifadə etməklə həm BANM-in tələbələri, həm də SOCAR-ın mütəxəssisləri üçün təlim proqramları nəzərdə tutulub. Tədris mərkəzinin bu qurğu ilə təmin olunmasında məqsəd təlimlərin keçirilməsi ilə yanaşı, burada tədrisə texniki və elmi-metodik dəstəyin verilməsidir. Bu təlimlərdə iştirak gələcək mühəndislərə və neft şirkətinin işçilərinə Triconex Demo sistemi haqqında əsas biliklər əldə etməyə imkan verəcək. Mütəxəssislər mərkəzdə texnoloji proseslərin təhlükəsizliyinin avtomatlaşdırılması sahəsində ən müasir texnologiyalarla tanış olacaq və təhlükəsizlik texnikası sahəsində öz biliklərini artırmaq imkanı qazanacaqlar.

“Schneider Electric” şirkətinin Mərkəzi Asiya ölkələri üzrə prezidenti Əmrah Təkdəmir bildirmişdir ki, Triconex Demo qəzalara avtomatlaşdırılmış nəzarət sistemi olaraq 30 ilə yaxın istismar müddətində qurğularda nasazlığın yaranmasının qarşısını alır.

30 Yanvar 2017

Bakı Ali Neft Məktəbində Meksika səfiri ilə görüş keçirilmişdir

+

Bakı Ali Neft Məktəbinin rektoru Elmar Qasımov Meksika Birləşmiş Ştatlarının Azərbaycandakı səfiri Rodriqo Labardini və səfirliyin attaşesi Mario Fernandezlə görüşmüşdür. Rektor BANM-in yaranma tarixi və fəaliyyət istiqamətləri haqqında məlumat vermiş, Məktəbdə görülən işlər və islahatlardan danışmışdır. Tədris prosesi, tələbələr üçün yaradılan imkanlar və beynəlxalq əlaqələrə toxunan Elmar Qasımov BANM-in müxtəlif aparıcı ali təhsil ocaqları, həmçinin beynəlxalq şirkət və qurumlar ilə əməkdaşlığından ətraflı bəhs etmişdir.

Meksika Birləşmiş Ştatlarının Azərbaycandakı səfiri Rodriqo Labardini səmimi qəbula görə təşəkkürünü bildirmiş, BANM ilə ölkəsinin ali təhsil müəssisələri arasında əməkdaşlığın inkşafı üçün böyük perspektivlərin olduğunu söyləmişdir. İki ölkə arasında təhsil əlaqələrinin genişlənməsinin vacibliyinə toxunan səfir Meksika Neft İnstitutu (Mexican İnstitute of Petroleum) ilə BANM arasında əməkdaşlığın mümkün perspektivlərini nəzərə çatdırmışdır.

Görüşdə, gələcək əməkdaşlıq, tələbə və professor-müəllim heyətinin mübadiləsi, elmi tədqiqatlar sahəsində əməkdaşlıq və BANM-də “Meksika günü”nün təşkili ilə bağlı fikir mübadiləsi aparılmışdır.

30 Yanvar 2017

Astara magistral qaz kəmərləri sahəsində cari təmir işləri aparılacaq

+

Yanvarın 31-də saat 10:00-dan 17:00-dək “Qaz İxrac” İdarəsinin Astara magistral qaz kəmərləri sahəsinin “Şahağacı” qazpaylama stansiyasında və bəzi ölçü qovşaqlarında cari təmir işləri aparılacaq. Təmir işləri aparılan müddətdə Astara rayonunun Kakalos, Siyəkürt, Telman, Pensər və Şahağacı kəndlərinin qaz təchizatında məhdudiyyətlər olacaq.

30 Yanvar 2017

Neft Daşlarında İriləşdirilmiş Seperasiya Qurğusu tikiləcək

+

SOCAR-ın “Azneft” İB-nin sifarişi ilə “Neftqazelmitədqiqatlayihə” İnstitutunun layihəsi əsasında “Neft Daşları” yatağında “Neftqaztikinti” Tresti tərəfindən yeni İriləşdirilmiş Seperasiya Qurğusu inşa olunacaq. 28 May adına NQÇİ-nin istismar edəcəyi nəzərdə tutulan bu qurğu yeni inşa olunacaq estakadayanı meydança üzərində yerləşdiriləcəkdir. Qurğunun texnoloji parametrlərinə fasiləsiz nəzarətin təmin edilməsi məqsədi ilə nəzarət ölçü cihazları, eyni zamanda avtomatika və yanğından mühafizə sistemləri, drenaj bloku, bütün digər zəruri texnoloji avadanlıqlar quraşdırılacaq, neft, qaz və texniki su xətləri çəkilərək mövcud sistemlə əlaqələndiriləcəkdir.

Qeyd edək ki, İriləşdirilmiş Seperasiya Qurğusu sutkada 13000 kubmetr neft, 3500 kubmetr suyu, həmçinin 100 000 kubmetrədək qazı qəbul etmək gücünə malik olacaqdır.

27 Yanvar 2017

BANM-də “Bərpaolunan enerji” mövzusunda seminar keçirilmişdir

+

Bakı Ali Neft Məktəbində “Bərpaolunan enerji: çağırışlar və perspektivlər” mövzusunda növbəti seminar keçirilmişdir. Seminarda dövlət orqanlarının, AMEA institutlarının, qeyri-hökumət təşkilatlarının təmsilçiləri, bir sıra şirkətlərin nümayəndələri, o cümlədən müstəqil ekspertlər, BANM-in professor-müəllim heyəti və tələbələri iştirak etmişlər.

İclasda “Azalternativenerji” MMC-nin Bərpa Olunan Enerji Resurslarının Monitorinqi Mərkəzinin rəhbərinin müavini Rasim Məmmədovun “Azərbaycanda bərpaolunan enerji resurslarının monitorinqi” mövzusunda məruzəsi dinlənilmişdir. Məruzəçi ölkə ərazisində bərpaolunan enerji resurslarının monitorinqini həyata keçirmək üçün 21 meteostansiyanın quraşdırıldığını və il ərzində radiasiyanın, temperaturun, rütubətin, küləyin sürətinin və sair parametrlərin ölçülməsi əsasında bərpaolunan enerji resurslarının qiymətləndirilməsinin nəticələrini açıqlamışdır. Sonda seminar iştirakçılarının sualları cavablandırılmışdır.

27 Yanvar 2017

SOCAR-da Qeyri-Hökumət Təşkilatları rəhbərləri ilə insan resurslarının idarə edilməsinə dair görüş keçirilmişdir

+

SOCAR-ın Baş Ofisində şirkətin kadr,rejim və informasiya texnologiyaları üzrə vitse-prezidenti Xalik Məmmədovun iştirakı ilə Qeyri-Hökumət Təşkilatları rəhbərləri ilə insan resurslarının idarə edilməsinə dair görüş keçirilmişdir. İnsan Resursları Departamentinin rəisi Asif Bəkirli tədbir iştirakçılarını salamlamış və 2016-cı il ərzində SOCAR-ın insan resurslarının idarə edilməsi ilə bağlı fəaliyyətini əks etdirən geniş təqdimatla çıxış etmişdir. Təqdimatda SOCAR-ın tabeliyində olan idarə və müəssisələrdə təhsil, təlim və karyera imkanları, bu istiqamətdə həyata keçirilən layihələr, vətəndaşların qəbulu, işçilərlə əlaqələr və başqa sahələr üzrə statistik göstəriçilər diqqətə çatdırılmışdır. Qeyd olunmuşdur ki, 2016-cı ildə əməkdaşların 5017 nəfəri başqa işə keçirilmiş, 1017 nəfəri isə işə yeni qəbul olunmuşdur. SOCAR üzrə Tarif-İxtisas Komissiyalarına 1630 nəfər müraciət etmiş, onlardan 1400-nün iddiası təmin olunmuşdur ki, bu da qəbul edilmiş ərizələrin 80 %-nin həll edilməsi deməkdir. SOCAR-da işə qəbul prosesinin mövcud əmək qanunvericiliyinə və şirkətdaxili standart və qaydalara əsasən, müsabiqə yolu ilə həyata keçirildiyi, müsabiqələrin İRD tərəfindən təşkil edildiyi və aidiyyəti sahə mütəxəssislərinin iştirakı ilə aparıldığı qeyd olunmuş, məlumat verilmişdir ki, 2016-cı ildə SOCAR-da elan edilmiş 1244 vakansiya üzrə müraciət etmiş 72567 nəfərdən 642 nəfər işə qəbul olunmuş, 246 nəfər isə kadr ehtiyat bazasına alınmışdır. Bununla yanaşı İRD tərəfindən işçilər arasında mütəmadi olaraq məmnunluq sorğusu da keçirilir ki, bu yolla hər bir əməkdaş tərəfindən tutduğu vəzifənin qənaətbəxşliyi qiymətləndirilir. İl ərzində İRD tərəfindən motivasiya və effektivliyin artırılması məqsədi ilə həm işçilər, həm də təşkilat rəhbərləri üçün müvafiq kurslar təşkil olunub. Təqdimatda SOCAR-ın Xarici və Daxili Təqaüd Proqramları, Yay məktəbi, Ödənişli yay təcrübəsi proqramları, eləcə də neft sənayesi üçün peşəkar fəhlə kadrlarının hazırlanması üçün təlim mərkəzlərinin fəaliyyəti haqqında məlumat verilmişdir.

Toplantıda çıxış edən SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov şirkətdə həyata keçirilən kadr siyasəti, müxtəlif layihələr barədə ətraflı məlumat vermiş, bildirmişdir ki, şirkət üçün insan faktoru mühüm amildir. X.Məmmədov bildrimişdir ki, SOCAR-ın qarşısına qoyulmuş hədəflərin dəf olunması üçün insan resurslarının idarə ediməsi sahəsində dəyişikliklərə ehtiyac var. Nəzərə çatdırılmışdır ki, Azərbaycan Respublikasın sosial-iqtisadi həyatında əvəzsiz xidmətləri olan SOCAR müntəzəm olaraq birgə fəaliyyət göstərdiyi beynəlxalq məsləhətçi şirkətlərlə insan resurslanının idarə edilməsi sahəsində proqramlar icra edir və bu da daha effektiv nəticələr əldə etmək, proseslərin şəffaflığını daha da artırmaq üçün əlavə imkanlar yaradır.

Görüşdə iştirak edən QHT rəhbərlərindən “Konstitusiya” Araşdırmaları Fondunun prezidenti Əliməmməd Nuriyev, Azərbaycan Milli Qeyri-Hökumət Təşkilatları Forumunun prezidenti Rauf Zeyni, İslahatçı Gənclər İctimai Birliyinin sədri Vüsalə Hüseynova, Beynəlxalq Avrasiya Mətbuat Fondunun rəhbəri Umud Mirzəyev, Neftçilərin Hüquqlarının Müdafiə Təşkilatının sədri Mirvari Qəhrəmanlı, Vətəndaşların Əmək Hüquqlarının Müdafiəsi Liqasının sədri Sahib Məmmədov və başqaları çıxış edərək, SOCAR-ın həyata keçirdiyi layihə və proqramlardan söz açmış, vətəndaş cəmiyyəti ilə əlaqələrini müsbət qiymətləndirmiş, QHT ilə əməkdaşlığın genişləndirilməsi istiqamətində təkliflər vermişlər.

27 Yanvar 2017

“Günəşli” yatağındakı 121 nömrəli quyu əsaslı təmirdən sonra istismara verilmişdir

+

Ölkəmizin neft-qaz sənayesində əhəmiyyətli rola malik “Günəşli” yatağındakı 3 saylı dərin dəniz özülündən 121 nömrəli quyu əsaslı təmirdən sonra istismara verilmişdir. Quyu məhsuldar qat çöküntülərinin IX horizontundan qazlift üsulu ilə məhsul vermiş, 2798-2739 metr intervaldan sutkalıq 40 ton neft və 3500 kubmetr qaz hasilatı ilə istismar fonduna qəbul edilmişdir.

Quyuda istismar işləri “Azneft” İstehsalat Birliyinin “28 May” Neft və Qazçıxarma İdarəsi tərəfindən həyata keçirilir.

More