|
Azərbaycan Respublikası Prezidentinin 22 dekabr 2005-ci il tarixli 340 nömrəli
Fərmanı ilə "Azərbaycan Respublikası Dövlət Neft
Şirkətinin Strukturunun təkmilləşdirilməsi haqqında"
Azərbaycan Respublikası Prezidentinin 2003-cü il 24
yanvar tarixli 844 nömrəli Fərmanına edilmiş əlavə və
dəyişikliklərə uyğun olaraq Azərbaycan Respublikası
Dövlət Neft Şirkətinin 23 dekabr 2005-ci il tarixli 132
nömrəli əmrinə əsasən Geofizika və Mühəndis Geologiyası İstehsalat Birliyi yenidən təşkil edilərək onun
bazasında "Geofizika və geologiya" İdarəsi
yaradılmışdır.
Geofizika və geologiya İdarəsi Azərbaycan
Respublikasında və xarici ölkələrdə (müqavilə olduqda)
yer qabığının dərinlik geoloji quruluşunun öyrənilməsi
və dərin kəşfiyyat qazıması üçün lokal strukturların
hazırlanması məqsədilə geofiziki tədqiqat (seysmik,
qravimaqnit və elektrik) işlərinin aparılması, quyu
kəsilişlərinin geofiziki üsullarla tədqiqi, quyuların
perforasiyası, yataqların işlənməsinə geofiziki nəzarət,
neftli-qazlı sahələrdə mühəndisi-geoloji və topoqrafiya
işlərinin aparılması ilə məşğul olur. Geofizika və
geologiya İdarəsinin tərkibinə "Mədəngeofizika İdarəsi",
"Kəşfiyyatgeofizika İdarəsi", "Kompleks geoloji kəşfiyyat və
topoqrafiya İdarəsi", "Nəqliyyat və xüsusi texnika
İdarəsi" və "Geofizika Elmi-Tədqiqat İnstitutu" daxildir.
|
|
